Vaamonde, Lamas & Romero
Vaamonde,Lamas&Romero é o nome da nova aventura de tres animais da escena musical galega: Suso Vaamonde, Pedro Lamas e Xosé Lois Romero. Unha proposta atrevida, pero divertida. Un proxecto cun tratamento sofisticado e innovador propio do novofolk galego, ao que mesmo se lle podería colgar a etiqueta de minimalista, pero que agocha unha refrescante posta en escena que combina música e oralidade a partes iguais… iso si, cunhas doses enormes de retranca.
Música popular, tradicional, a de sempre, a arte vella… e bela, a dos músicos do país, maquillada e ataviada cunha nova vestimenta elegante e sobria, pero nada máis lonxe do seu propósito de xogar cos prexuízos, rachar cos tópicos e, sobor de todo, pasalo ben; eles e o público.
Boa música e mellor humor son os activos deste traballo que chega a nós nestes tempos de crise como bálsamo terapéutico e liberador.
