Dispoñibilidade: 10-15 días

Ano: 2007
Formato: CD
Idioma das letras: Galego
Código de barras: 8424295043252
Ref.: DM4325-02

Sihá

Mercedes Peón

Editora: Discmedi

Sihá é un berro que se abre ao mundo desde ese lugar onde, dicían, remataba. É a voz da terra ferida polos sachos e a voz do mar. Dese mar que cando está calmo serve para enmarcar os solpores máis fermosos que podamos imaxinar pero que, cando se alporiza, brúa de xeito enxordecedor e cubre con escumallos de xenreira as rochas da Costa da Morte. É o eco do canto daquelas velliñas de Bergantiños que abriron para sempre o corazón da Mercedes á música tradicional da súa terra. As lembranzas dos anos percorrendo pobos e aldeas para recuperar do esquecemento antigas melodías. É a memoria reclamando o presente. Un espazo no que os ritmos ancestrais recordan que entre o norte de África e a torturada costa atlántica galega, a distancia non é tal. Como tampouco o é aquilo que separa avangarda de tradición, aquí caras da mesma moeda, metades perfectas dun todo indivisíbel. É o terceiro traballo discográfico da galega, a voz máis creativa e orixinal do Novo Folc. Un álbum de forza torrencial, conducido pola hipnótica voz dunha muller que agroma a visceralidade coa creatividade irrefreábel e a doce poética do sublime.